Jóladagatal Soffíu - 15 dagar til jóla

Jóladagatal...15

Þetta gæti verið skemmtilegt föndur með krökkunum.  Það þarf ekki að kosta mikið að gera svona stjörnu.  Þessa stjörnu fann ég hér.

Ég hugsa alltaf um það þegar ég hendi klósettrúllum hvort ég ætti að setja þær í "föndur safnið" sem samanstendur af örfáum eggjabökkum og nokkrum glimmerlímtúbum sem ég var að kaupa, en það stendur til að stækka safnið.  Ég mun að minnsta kosti safna klósettrúllunum eitthvað fram að jólum og sjá svo til hvernig gengur á þær.

Ég meir að segja rakst á leiðbeiningar hér þar sem maður getur búið til sitt eigið glimmer úr salti.  Ef það virkar vel þá gæti það sparað einhverja aura.  Þið finnið leiðbeiningarnar neðst á síðunni til hægri undir Non Toxic Glitter.  Til að gera svona glimmer þarf bara bökunarplötu, álpappír, salt og matarlit.  Hljómar einfalt...

Fyrri færslur jóladagatalsins...

16 dagar til jóla

17 dagar til jóla

18 dagar til jóla

19 dagar til jóla

20 dagar til jóla

21 dagur til jóla

22 dagar til jóla

23 dagar til jóla

Jóladagatal Soffía - 16 dagar til jóla og bbq speltvefja í hádeginu

Jóladagatal...16

Það er hellingur af sætum smákökuuppskriftum á þessari síðu.

Mér finnst koma rosalega vel út að nota silfurlituðu kökuskrautskúlurnar sem jólakúlur á smákökujólatré!

 

Og svo er sniðug hugmynd að gefa einhverjum snjókallasmáköku í pörtum sem viðkomandi setur saman sjálfur. Sem sagt, margt skemmtilegt á þessu bloggi.

Í hádeginu fékk ég mér kjúklingavefju, langaði í fersk grænmeti en samt eitthvað sem bragð var af, þar kom kjúklingur með bbq sósu sterkur inn.  Gott hráefni er lykilatriði og ferskt kóríander og avacado gerir mikið.  Ég notaði speltvefjur sem ég keypti út í búð og voru stórfínar.

BBQ kjúklingavefja (fyrir 4)

• 2 kjúklingabringur
• Nokkrar msk bbq sósa
• Salat
• Grænmeti
• Avacado
• Ferskt kóríander, 1-2 lúkur
• pínku sítrónusafi
• Sýrður rjómi, ca hálf dós
• mossarella
• Speltvefur eða tortilla kökur

Skerið bringur í munnbita, veltið þeim upp úr bbq sósu.  Steikið á pönnu.

Skerið niður salat og grænmeti.  Ég notaði agúrku, papriku, tómata, salatblöð, ferskt kóríander og rauðlauk.

Maukið saman með t.d töfrasprota sýrðan rjóma og lúku af kóríander og smá sítrónusafa.  Saltið og piprið eftir smekk.

Hitið tortilla kökurnar í ofn í smá stund.  Fyllið þær með kjúklingi, grænmeti, osti og sósu.

 

Fyrri færslur jóladagatalsins...

17 dagar til jóla

18 dagar til jóla

19 dagar til jóla

20 dagar til jóla

21 dagur til jóla

22 dagar til jóla

23 dagar til jóla

Jóladagatal Soffíu - 17 dagar til jóla

Jóladagatal...17

Þá eru 17 dagar til jóla, og þar af tvær helgar.  Það mætti nota einn af þeim dögum í að búa til snjóboltasúkkulaðiskál.  Hér geyma þau sykurpúða í skálinni.  Ég er nú ekki mikið fyrir sykurpúða en það mætti kannski finna einhver önnur not fyrir skálina.  Þetta er að minnsta kosti sætt.  Hér er linkur með nánari leiðbeiningum.

Á meðan það er verið að dunda sér í eldhúsinu (eða hvar sem er)þá er ekki úr vegi að fara í sarpinn á rás 1 á ruv.is og finna þætti eins og Matur er fyrir öllu eða nýja jólaþætti sem hófu göngu sína nú fyrir jólin sem heita Könglar og kertaljós.  Sniðugur þessi sarpur, að geta hlustað á gamla útvarpsþætti þegar manni hentar.

Og fyrst við erum í snjóköllum og sykurpúðum þá væri hægt að gera svona skreytingu á smákökurnar. Nánar um það hér.

 

Jóladagatal Soffíu -18 dagar til jóla og Lamumba

jóladagatal...18

Þessa fallegu stjörnu rakst ég á á pinterest.com.  Það fylgdi ekki slóð með henni, en svo virðist sem einhver er að selja svona á Etsy vefnum. En það mætti gera svona sjálfur og ég væri jafnvel til í að gera svipaða pæling nema jólakúlu í þrívídd.  Það væri verðugt verkefni...

 

Eitt af því skemmtilegasta sem ég gerði í vetrarkuldanum um jólahátíðina þegar ég bjó í Kaupmannahöfn var að fara á Sporvagninn, hamborgarastað sem var innréttaður eins og sporvagn og er við Grábræðratorg, og fá mér Lamumba.  Þetta fékk maður með sér í take away, og rölti um götur miðbæjarins á meðan maður gæddi sér á Lamumba sem er heitt kakó með koníaki...

Lamumba

• Heitt kakó
• Koníaksslurkur
• Þeyttur rjómi

Setjið skvettu af koníaki út í heitt kakó, toppið með þeyttum rjóma.  Setjið jafnvel í pappamál eða "to go" bolla og takið með ykkur út í göngutúr. 

 

Jóladagatal Soffíu - 19 dagar til jóla og myntu dressing

JÓLADAGATAL...19

Ef þið bakið amerískar pönnukökur í morgunmat fyrir krakkana þá má nota piparkökumót til að skera þær út.  Ég skar þær út eins og jólatré og smá mætti nota hugmyndaflugið til að skreyta þær, t.d bláber eða önnur ber smátt skorin.  (Afskurðurinn fór svo ofan í mig)

Svo má nota piparkökumótin til að skera út brauðsneiðar, melónur, eplasneiðar og ýmislegt fleira.

Ég veit ekki hvort það er út af því að það eru að koma jól eða hvort þetta er tilviljun en ég er farin að nota ansi mikið af jólalegu litasamsetningunni rauðu og grænu í matargerðina.  Áðan var Rib eye steik í matinn.  Ég ákvað að vera með nýjung og gera myntu dressingu til að setja ofan á steikina.

Það smakkaðist ágætlega.  Ég er bara svo vanaföst þegar kemur að steik að ég vil helst ekkert nema pipar, og nóg af honum.  En dressingin var fersk og mjög góð og væri alveg frábær með góðum fiski. 

 

Myntudressing

• Ein lúka fersk mynta
• Ferskur rauður chile (magn fer eftir styrk piparsins, ég notaði hálfan)
• 2-3 geirar hvítlaukur
• Safi úr hálfri sítrónu
• 2 msk ólífuolía
• smá salt og pipar

Saxið myntuna smátt, skerið piparinn mjög smátt ásamt hvítlauk.  Blandið öllu vel saman. 

Fyrri færslur jóladagatalsins

20 dagar til jóla

21 dagur til jóla

22 dagar til jóla

23 dagar til jóla

Jóladagatal Soffíu - 20 dagar til jóla

Heilræði við piparkökugerð:

Alveg dæmigert ég, skellti í piparkökudeig.  Kældi það, flatti út, skar deigið svo fyllti þrjár plötur.  Bakaði fyrstu plötuna til þess eins að komast að því að ég gleymdi að setja smjör í uppskriftina.  Enda fannst mér hún einstaklega þurr svo ég þurfti að setja skvettu af mjólk í deigið.

Kökurnar urðu extra harðar og því miður óætar, þannig að... ekki gleyma smjörinu!

Enn er ég að telja niður í jólin með jólalegum færslum og í dag langar mig að koma með hugmyndir að innpökkun sem ég hefir rekist á á netinu.

Ég sá þennan tvinna á einhverri síðunni og fannst hann svo fallegur, væri eflaust fallegur utan um einhverja pakkana.  Og viti menn, stuttu síðar rakst ég á hann í Barnabúðinni á Laugarveginum, ég gáði ekki að því hvað hann kostaði en mun gera það næst þegar ég á leið hjá og eflaust fjárfesta í honum ef mér blöskrar ekki verðið...

Og hér er heimasíðan þeirra.

Þetta eru sætir pakkar, með pasta slaufum, fyrir mataráhugafólk, nánar um þá hér.

Við gerðum indverska matarveislu í gær með vinarfólki okkar.  Þau komu með alls konar krydd og fulla poka af mat.  Úr varð að við elduðum lambarétt og kjúklingarétt.  Ekki fórum við sérstaklega eftir uppskriftum heldur gerðum við bara "eitthvað" með hliðsjónsjón af fyrri reynslu í eldun á indverskum réttum. 

Við vorum með það sem er mikilvægast í indverskri matargerð, góð krydd.  Við byrjuðum á að fá fram bragðinu í kryddunum með því að hita þau í olíu á pönnu.  Svo fór lambið á eina pönnu og kjúklingurinn á hina.

Og því næst tómatar, jógúrt og grænmeti með lambinu og maukaðar cashew hnetur, kúrbítur og tómatar með kjúklingnum.

Svo var fullt af fersku kóríander, hvítlauk, engifer og chile.

Í hrísgrjónin fór eitthvað af kryddi og svo goji ber, það var mjög gott.

Og að sjálfsögðu var heimalögðu raita og heimagert mango chutney.

Raita

• 2 dl AB mjólk
• hálf agúrka, gróft skorin
• hálfur rauðlaukur (rokkar) fínt skorinn
• 1 tsk garam masala
• ca 2-3 tsk Maldon salt
• Sett í kæli í svona hálftíma.

Naan brauðið heppnaðist einstaklega vel.  Ég notaði pizzu grill aðferð Hestons sem ég bloggaði um hér þar sem ég set ofninn á grill og hef brauðin eins nálægt grill elementinu og ég get.

Og hér er naan brauðið

• 2 tsk ger
• 4 msk volg mjólk
• 2 tsk sykur
• 1 egg
• 1 tsk lyftiduft
• 1/2 kg hveiti
• 1 dl ab mjólk
• Vatn eftir þörfum

Ég byrjaði á að leysa gerið upp með volgri mjólk og sykri í kitchen aid skálinni minni.  Bætti því næst hveitinu, eggi, lyftidufti, ab mjólk og setti hrærivélina í gang.  Svo bætti ég við vatni þar til ég var komin með mjúkt og fallegt deig. (Ég reyndar blandaði saman ab mjólk með vel volgu vatni og hrærði það smá saman, byrjaði á að setja út helminginn af því og svo restina smám saman þar til ég var ánægð með áferðina.  Ætli ég hafi ekki verið með um 1.5 dl af vatni út í ab mjólkinni. Og svo áttiég ekki mjólk, þannig að ég leysti gerið upp með smá ab mjólk og heitu vatni svo úr varð volg blanda)

Mér fannst koma vel út að setja egg í deigið.

Svo flatti ég þetta út, svona eins og naan lítur yfirleitt út.  Við vorum með mjög góðan chile, ekki of sterkan en þó með góðu bite-i.  Þannig að við skárum hann smátt og svo potaði ég því hér og þar í naanið.  Svakalega gott.  Og um leið og naan brauðið kemur úr ofninum, setið þá smjörklípu á það svo hún bráðni yfir brauðið.

 

Jóladagatal Soffíu - 21 dagur til jóla

JÓLADAGATAL...21

Það er hægt að gera ýmislegt jólalegt í dag.  Ég hef t.d lesið hér og þar að það eru ýmsir jólamarkaðir um allan bæ.  Meðal annars er jólamarkaður hjá okkur hér í Kjósinni.  Hann er frá 13.00 - 17.00 og ýmislegt á boðstólnum meðal annars afurðir beint frá býli.

Færðin inn í Hvalfjörð er ágæt ef maður er vel dekkjaður, en það borgar sig að keyra hægt og fara varlega.

Svo er örugglega jólalegt um að litast í húsdýra og grasagarðinum.  Ég hitti þennan jólalega náunga þegar ég var þar um daginn

Þegar ég er að vafra um á pinterest.com þá rekst maður oft á krúttaralegt jólaskraut.  Mér fannst þessir gaurar mjög sætir og það væri gaman að prófa að gera eitthvað svipað með krökkunum.

Það eru engar leiðbeiningar hvernig þetta er gert, en hér er síðan sem þetta kemur af. En það er hægt að hafa myndina til hliðsjónar og spila svo úr því föndurefni sem maður á eða getur nálgast.

Fyrir þá sem ætla að vera heima í dag og langar í eitthvað gott með kaffinu þá mæli ég með Letingjabrauði, og í því er kanill og negull þannig að það er meir að segja pínu jóló.

Letingjabrauð

• 300 gr sykur  (en 200 er alveg nóg!!)
• 240 gr haframél
• 350 gr hveiti
• 4 tsk sódaduft
• 2 tsk kakó
• 2 tsk kanill
• 1 tsk negull
• 7 dl mjólk.

Öllu hrært sama, bleytt með mjólkinni.  Sett í tvö form, og bakað við 200° í 45 mín -  1 klst. Þetta er best nýbakað með fullt af smjöri sem bráðnar á brauðsneiðinni.

Ég nota ekki meir en 200 gr sykur, og bý líka oft til bara hálfa uppskrift.

Jóladagatal Soffíu - 22 dagar til jóla

JÓLADAGATAL...22 

Það er ekki hægt annað en að kíkja á vefinn hennar Mörthu Stewart  fyrir jólin, enda hafsjór af föndri og bakstri á þeim bæ.

Til að mynda þessar rosalega fínu snjóbolta-jólakúlur sem mig langar að prófa að gera.

Og hér eru leiðbeiningar um hvernig gera megi þessa snjóbolta

Og talandi um snjóbolta þá er ekki úr vegi að minnast á kökuna sem ég gerði um daginn, þetta var smá æfing fyrir næsta barnaafmæli og kom ágætlega út, nú veit ég hvað betur má fara og það er ekki spurning að ég geri þessa köku aftur.

Ís-kaka

Það er í sjálfu sér engin uppskrift af þessari köku, en hér eru punktar sem ég ætla að fara eftir næst þegar ég geri hana.

- Mér finnst Betty Crocker köku mix mjög gott, mér hefur ekki tekist að gera súkkulaðiköku sem er jafn flöffí. Þannig að eflaust nota ég Betty súkkulaðiköku mix, þessi kaka er á þremur hæðum.

- Vöffluísformið fékk ég út í ísbúð.

- "ísinn" á kökunni er Betty Crocker súkkulaðikrem en það krem sem lekur er heimagert ganache.

Ganache

• Rjómi
• 70 % suðusúkkulaði

Rjóminn hitaður í potti, súkkulaðið brætt út í.  Kælið.  Yfirleitt er Ganache kælt í ísskáp í góðan tíma, en ég vil hafa kremið blautt svo það renni vel niður hliðarnar, þannig að ég rétt leyfi því að standa smá.

Ég notaði ekki smjör í mitt Ganache, en hlutföll milli rjóma og súkkulaði er ca 1 peli af rjóma, 250 g súkkulaði.  Annars skellti ég bara rjóma í pott og svo eins miklu súkkulaði og mér fannst koma vel út.

- Hvíta kremið er líka frá Betty.  En það er hægt að nota heimagert smjörkrem. 

- Í sjálfa kökuna, á milli laga,  setti ég sama súkkulaðikrem og "ískúlan" er úr.

- Ég dreifði úr Hrískúlum yfir súkkulaðiísinn, ís með dýfu og hrís...

-Til að fá hvíta kremið á kökunni sem sléttast þá hitaði ég reglulega hnífinn undir mjög heitu vatni.

 

Jóladagatal Soffíu - 23 dagar til jóla

JÓLADAGATAL....23

Þegar maður horfir út um gluggann getur maður ekki annað en farið í jólaskap, nú byrja ég formlega jólaundirbúning.  Í dagatalinu í dag ætlum við að læra að búa til stjörnu.

Munið þið eftir þessum fallegu stjörnum, þær voru mjög vinsælar þegar ég var lítil.  Það er frekar einfalt að fara eftir leiðbeiningunum til að búa þær til.  Það þarf ekki alltaf að eyða formúgu í jólaskraut eða efni í föndur. 

 Hér er linkur með mjög góðum skýringamyndum hvernig á að búa þær.

Í Tiger og sösterne Grenes fást mjög fallegir pappírar með allskonar munstri, svona origami-legir.  Það má klippa þá niður í strimla og gera stjörnur úr þeim.  Svo eru hvítar stjörnur alltaf klassískar og myndu sóma sér vel sem skraut á jólapakkann. Svo er um að gera að leyfa hugmyndafluginu að njóta sín þegar kemur að pappírsvalinu.

Farin út að renna mér á snjóþotu, njótið dagsins!

Epla crumble

• Epli, 3-4 stk
• 1/2 - 1 msk kanill (eftir smekk)
• 1 msk sykur
• 1/2 dl smjör
• 1/2 dl púðursykur
• 1/2 dl hveiti
• 1/2 dl haframjöl

Skerið eplin í bita.  Raðið þeim í eldfast mót sem hefur verið smurt. Dreifið kanilsykri yfir.  Blandið saman smjöri, púðursykri, hveiti og haframjöl saman, gott að nota bara puttana þar til þetta er farið að haldast nokkuð vel saman.  Dreifið úr þessu yfir eplin, svona eins og þið væruð að dreifa osti yfir pizzu. 

Hlutföllin í "crumble" er 2 af hveiti á móti einum af smjöri og einum af sykri.  Ég notaði bæði hveiti og haframjöl 50/50, en það má vera bara hveiti.

Bakið í ofni við 200°c í hálftíma.

Einfalt brauð og blessuð börnin sem koma með jólaskapið

Fyrsti í aðventu, yndislega jólalegt úti og loksins get ég farið að setja upp jólaljósin, farið að taka jólabaksturinn alvarlega og yfir höfuð farið að sinna öll því sem við kemur jólum, ég ætla að vera extra jólaleg í ár og er búin að safna í föndur og allt. 

Það er af sem áður var, því það má með sanni segja að það er önnur stemmning þegar maður er komin með barn.  Nú er fátt skemmtilegra en að baka smákökur, jólaföndrað, horfa á jólalegar teiknimyndir, fá sér heitt kakó með rjóma eftir að hafa eytt deginum í að búa til snjókarl og fara á sleða (og fara í húsdýragarðinn....sem að öllu jöfnu hefði aldrei hvarflað að mér að gera).

Hér áður fyrr voru jólin svona:

Á 3ja glasi einhvertíma fyrir jólin var keyptur miði til Frakklands og tveim dögum síðar var maður lentur og farin að gæða sér á fois gras, dýrindis rauðvínum, dásamlegum pulsu og ostadiskum í 3 vikur yfir jól og áramót.

Gleðileg jól í Frakklandi

Eða þessum hátíðisdögum var eytt með vinum í Tékklandi  þar sem gengið var um allar fallegu göturnar í Prag á milli þess sem maður fékk sér gin og tonic og  tékkneskan bud ásamt því að heimsækja sjálfa verksmiðjuna til að gæða sér á þessum guðaveigum beint af kúnni.

Aðfangadegi var eitt sinn eitt í Kristjaníu með öllum þeim sem höfðu ekki efni á mat á jólum, áttu engan að eða bara vildu góðan mat og félagsskap voru velkomnir. Hápunkturinn var þegar Olsen bræður mættu á svið og tóku Fly on the wings of love....what not to love about that???

Spánn, Danmörk, Kanada, Tékkland, Frakkland, England....jólunum hefur verið eitt víða um heim og alltaf verið jólalegt og ótrúlega gaman.  Já, það er af sem áður var en það alltaf gaman að prófa eitthvað nýtt og í mínu tilfelli er það nýjung að fara í húsdýragarðinn, baka smákökur og skeppa á Austurvöll og horfa á jólatréð í allri sinni dýrð.

Jæja, það á að gefa börnum brauð.

Mér finnst brauð með allskonar kornum og fræjum svo gott.  Þetta brauð er svolítið þétt í sér, en það er allt í lagi ef það er borið fram nýbakað þannig að smjörið bráðni á því. 

Hér er ekkert ger og ég blandaði hráefninu létt saman í kitchen aid, það er samt ekkert mál að gera þetta í höndum, því það þarf alls ekki að hnoða mikið, bara rétt nóg til að blanda öllu vel saman.

Það stóð til að búa til súpu og bera fram brauðið með henni sm kvöldmat, en það var svo gott svona nýkomið úr ofninum að það kláraðist samstundis.

Kornbollur

• 1 dl hafrar
• 2 dl spelt (eða hveiti eða heilhveiti)
• 2 dl fræ (Ég notaði sólblómafræ, 5 kornablöndu og sesame fræ)
• 1tsk lyftiduft
• 3 msk sýróp
• 2 tsk salt
• 2 dl vatn (eða eftir þörfum)

Öllu hnoðað saman, gerið bollur eða mótið í hleif.

Ég gerði bollur, bakaði þær við 200°c í ca 20 mín.