Halloumi ostur, frábær forréttur ef þið ætlið út að grilla í dag

Ég er núna að lesa  bók eftir Michael Pollan sem heitir Cooked.  Ég mæli algjörlega með henni. Kaflinn um brauðgerð er sérlega áhugaverður!

 

Ég hef verið að reyna fyrir mér í súrdegisbrauðbakstri, það hefur gengið ágætlega.  Síðasta brauð sem ég gerði kom mjög vel út fyrir utan það að ég gleymdi því í ofninum 45 mínútum of lengi þannig að skorpan brann almenninlega en ótrúlegt en satt þá var brauðið undir skorpunni ljúffengt.

 

Ég fór í ostabúð fyrir nokkkru og spurði um Halloumi ost og afgreiðslukonan vissi ekki hvað var sem mér fannst ansi undarlegt, miðað við að ég var í búð sem sérhæfði sig í ostum og Halloumi er nokkuð vinsætt erlendis.

Nema hvað, svo er loksins hægt að fá hann í Búrinu og meir að segja hefur hann fengist í Bónus undanfarið.

Það besta við Halloumi er hvað hann er saltur, mmmmm.  Svo er hann þéttur í sér þannig að hann bráðnar ekki þegar maður skellir honum á panini grillið eða á grillpönnuna.  Það er nefnilega möst að hita þennan ost til að hann njóti sín sem best.

Ég mæli með því að þið prófið þennan ost.  HAnn er góður einn og sér eftir að hafa fengið 1-2 mínútur á grillinu.  Svo er hann líka meiriháttar í salat, Halloumi salat þar sem hann er í aðalhlutverki.

Ef þið ætlið að grilla í dag þá er fullkomið að skella ostinum á útigrillið, ásamt pizzadeiginu til að gera "flat bread". 

Ég var mikið að velta fyrir mér hvernig ég ætti að bera hann fram miðað við hvað til var og þetta var útkoman og hún var vægast sagt frábær, osturinn fékk svo sannarlega að njóta sín í þessari útfærslu.  Rauðlaukurinn rokkaði með.

 

Grillaður Halloumio með ruccola og rauðlauk og grilluðu flatbrauði

 

• Halloumi
• Klettasalat (Ruccola)
• Rauðlaukur
• Pizzadeig

 

Skerið Halloumi ostinn í sneiðar, u.þ.b hálfan cm á þykkt. Leggið klettasalat á disk, stráið fínt skornum rauðlauk yfir.  Leggið grilluðu ostsneiðarnar ofan á salatbeðið.

Berið fram með flatbrauði (flat bread).

Flatbrauðið gerði ég á eftirfarandi hátt.

Ég tók heimagert pizzadeig sem  ég átti inn í ískáp, flatti það þunnt út í kökur á stærð við pítubrauð. Síðan skellti ég þeim í panini grillið eftir að hafa penslað það létt með ólífuolíu.  Það tekur ekki nema nokkrar mínútur og elda pizzadeigið þannig.  Svo skar ég það niður eins og ég væri að skera pizzu og bar það fram með ostinum.

Njótið veðurblíðunnar í dag, langþráð blíða, ég er farin út með ofninn góða að baka flatkökur.