Rúgmjölsbrauð

Ég er með brauðbökunaræði, hef ekki keypt brauð í háa herrans tíð. Ég baka allt sjálf, rúgbrauðið, flatkökurnar, pizzunar, píturnar, tortillurnar, naanbrauðið, kornbrauðið,  beyglurnar, rúgmjölsbrauð...

 

 

 

Rúgmjölsbrauð

 1 bolli er 2,4 dl.

 

• 1 1/2 msk þurrger
• 1/2 bolli volgt vatn
• 1 msk sykur
• 1/2 bolli púðursykur hrærður upp í 1/2 bolla af vatni
• 1/2 bolli volgt vatn
• 1 msk salt
• 2 msk matarolía
• 2 bolla rúgmjöl
• 2-3 bolla hveiti
• 1/2 bolli sólblómafræ

 

Svo getið þið bætt við hvaða fræjum sem er eða alveg sleppt þeim.

 

1. Hitið ofn í 200°c.
2. Látið gerið freyða í 1/2 bolla af volgu vatni ásamt sykri (tekur um 5 mín).
3. Bætið við 1/2 bolla af volgu vatni út í gerblönduna ásamt púðursykri sem var leystur upp með vatni, salti, olíu og rúðmjöli.
4. Hrærið vel saman.
5. Bætið við hveiti smám saman þar til þið eruð komin með gott mjúkt deig og ekki klístrað.
6. Leyfið deigi að hefast í skál undir rökum klút eða plasti í klst eða þar til það hefur tvöfaldast.
7. Sláið deigið niður og hnoð'ið saman við það sólblómafræjum.
8. Skiptið deiginu í tvennt og mótið úr því tvo brauðhleyfa.
9. Leggið þá á smjörpappír á bökunarplötu undir rökum klút og leyfið því að hefast í hálftíma – klst.
10. Bakið í 30 mín við 200°c. 

 

 

 

Beyglur

Pizzadeig er svoldið eins og ostur, það má eld´aða, bak´aða, grill´aða, steikj´aða og sjóð´aða. Og svo hef ég rekist á fólk sem er sólgið í það hrátt.

 

- Það er upplagt að baka það, það fer ekki milli mála.

 

- Það er mjög gott að grilla það.

 

- Bestu pítubrauðin eru gerð úr pizzadeigi og elduð á heitri, þurri pönnu.

 

-  Steikt pizzadeig, sem hefur verið flatt út eins og tortilla má nýta á ýmsan hátt eða búa til kodda með fyllingu og djúpsteikja.

 

- Soðið pizzadeig, ójá. Fyrst mótar maður deigið eins og kleinuhring, svo sýður maður það í 1-2 mín. Því næst bakar maður það í ofni. Þá fær maður fyrirtaks beyglur.

 

 

Beyglur

• 2 tsk þurrger
• 2 tsk sykur
• 1 1/4 bolli volgt vatn
• 500 g hveiti (ca 3 1/2 bolli)
• 2 tsk salt
• Fræ eftir smekk, t.d sesame fræ og þriggja korna blanda
• 1 eggjahvíta

 

1. Látið gerið freyða með 1/4 bolla volgu vatni og sykrinum. Bætið svo rest af volgu vatni út í, saltinu og hveitinu. Notið eins mikið hveiti og þið þurfið til að fá gott pizzadeig. Hnoðið extra vel.

 

2. Leyfið deiginu að hefast í klst.

 

3. Skiptið því í 8 jafna parta. Mótið litla bolta og gerið gat í miðjuna með fingrinum, svo þetta líti út eins og beygla.

 

4. Látið hefast undir rökum klút í korter.

5. Sjóðið vatn. Setjið beyglurnar í vatnið, nokkrar í einu, eins og komast fyrir í pottinum. Sjóðið í um eina mín á hvorri hlið.

 

6. Setjið soðnu beyglurnar á bökunarplötu, penslið með eggjahvítu og stráið yfir þær fræjum ef þið viljið. Ég mæli með þriggja korna blöndu og/eða sesamfræjum.

 

7. Bakið í ofni í u.þ.b korter á 220°c.

Súkkulaðikaka með rauðbeðum og smá föstudagsfjör

Halló, halló. Það eru komnir nokkrir dagar síðan ég setti inn uppskrift hér en færslurnar hlaðast upp í hausnum á mér. Ég punkta þetta svo hjá mér í tölvunni og er komin með helling af skemmtilegheitum og ég veit ekki hvar ég á að byrja. Svo hef ég verið að vafra netið og er komin með slatta af uppskriftum sem mig langar til að prófa.

Föstudagsfjör

Tónlistin: Wilco og Feist

Vefsíðan: Fullt af videóum um mat...

Uppskrift frá blogginu mínu fyrir ári síðan.

Uppskrift frá blogginu mínu fyrir tveim árum síðan.

Vínið: Ég keypti kassavín um daginn, það var bara aldeilis ágætt.  Era, Sangiovese, frá ítalíu.

___

Og áfram heldur baksturinn. Mig hefur lengi langað að prófa að setja soðnar rauðbeður í súkkulaðiköku, lét loksins verða af því og viti menn. Það er mjög gott!

 

 

Red velvet kaka er lituð með rauðbeðum eða eins og flestar uppskriftir segja til um,  rauðum matarlit.   Hér er ein girnileg uppskrift með rauðbeðum.

 

Og svona er sama uppskrift, um það bil, á íslensku:

 

Nokkurskonar “Red Velvet” muffins með rauðbeðum

• 3/4 bolli vel maukaðar rauðbeður (setti þær í matvinnsluvél)
• 1/2 bolli olía
• 1/2 bolli mjólk
• 3 msk AB mjólk eða hrein jógúrt
• 2 egg
• 3/4 bolli hveiti (3/4 skv uppskrift en ég notaði eitthvað meir en það)
• 2/3 bolli sykur
• 1/2 bolli kókó
• 1 tsk lyftiduft
• 1/2 tsk matarsódi
• 1/4 tsk salt

Hitið ofn í 200°c. Setjið allt ofantalið í hrærivél og hrærið vel saman. Setjið í kökuform eða muffinsform.

Bakið í u.þ.b 25 mín.

Kælið og setjið á hana krem að eigin vali, t.d krem úr rjómaosti eins og ég notaði á makkarónurnar í færslunni hér á undan eða eitthvað gott súkkulaðikrem eins og t.d ganache...

Góða helgi.  Skemmtið ykkur vel yfir mat og drykk.

Brownies

Eins og sannri ráðskonu sæmir þá verður maður að gluða saman sætabrauði öðru hvoru, enda ekki ósjaldan sem vinir og vandamenn detta inn.

Ég er ekki mikill bakari en ákvað að skella í Brownies því það fer svo vel með ísnum sem ég talaði um í færslunni hér á undan.

Þessa uppskrift fann ég á netinu og hún er víst frá gaurunum sem eiga Baked. Þetta var fín uppskrift.

BROWNIES

Uppskriftin er mæld í bollum, en 1 bolli er 2,4 dl.

• 1 1/4 bolli hveiti
• 1 tsk salt
• 2 msk dökkt kakó
• 120 g dökkt súkkulaði
• 1 bolli ósaltað smjör
• 1 tsk instant espresso duft (má sleppa)
• 1 1/2 bolli sykur
• 1/2 bolli púðursykur
• 5 egg, við stofuhita
• 2 tsk vanilludropar
  
  

Hitið ofinn í 180°c. Smyrjið skúffukökuform ( 9x13 tommur eða 23 x 30 cm)

Hrærið saman hveiti, salti og kakói.

Bræðið saman súkkulaði og smjöri, ásamt espresso dufti í vatnsbaði þar til það er bráðnað. Bætið við sykrinum. Nú ætti blandan að vera við stofuhita.

Bætið við 3 eggjum í súkkulaðið og hrærið vel saman. Bætið við rest af eggjum og hrærið saman. Setjið vanilludropana út í. Passið ykkur nú að hræra deigið ekki of mikið.

Blandið hveiti mixinu við súkkulaðiblönduna, notið til þess sleif, blandið þessu varlega saman.

Setjið í form og bakið í miðjum ofni í u.þ.b 30 mín. Snúið forminu í 180°á miðjum bökunartíma til að fá jafnan bakstur.

Skerið í ferninga og geymið í loftþéttum umbúðum, þessi kaka geymist í um 3 daga í kæli.

Uxahalar og makkarónur

Í Kóreu eru uxahalar ótrúlega dýrir, eða um 100 dollarar fyrir einn hala. Ein af ástæðunum fyrir því að þeir eru svona dýrir er sú að Kóreubúar borða mjög lítið af nautakjöti. (Framboð - eftirspurn)

Ég eldaði uxahala um daginn, þeir voru bragðgóðir og svo meyrir, enda leyfir maður þeim að malla í 3-4 klukkutíma. Þeir eru yfirleitt notaðir í kássur eða súpur. Ég mæli með að þið prófið þetta kjöt ef þið rekist á það. Ég kaupi mitt kjöt hjá bóndanum á Hálsi, og þeirra halar eru súper.

Ein leið til að elda svona hala er að gera súpu að hætti Kóreubúa en hér eru linkar á nokkrar uppskriftir.

Kóreisk súpa

Kóreisk súpa II

Svo væri hægt að gera súpu eins og þeir gera á Hawaii.  Anís gæti verið spennandi krydd í uxahalasúpu.

Hawaii style

Hawaii style II

Og hér eru þrjár girnilegar frá Bon Appetit

Nú er ég komin með valavíða, veit ekki hvaða uppskrift ég ætti að prófa næst, en ég læt ykkur vita hvernig þetta endar hjá mér næst þegar ég elda uxahala.

Ég prófaði að baka makkarónur um daginn, hafði ekki gert svoleiðis áður enda ekki bakað mikið um ævina fyrr en ég flutti í sveitina. Þær heppnuðust ágætlega og kremið sem ég bjó til passaði vel við.  Ég átti eggjahvítur því ég bjó til ís um daginn.  Það er ágætt kombó, makkarónur og ís til að nýta bæði hvítur og rauður.

Makkarónur

ATH, best er að skilja hvítur og rauður að daginn áður og geyma í kæli.

• 2 eggjahvítur
• 70 g möndlur
• 130 g flórsykur
• 2 msk sykur
• Matarlitur ef þið viljið hafa þetta skrautlegt

Hitið möndlurnar í ofni við 150°c í 10 mín. Leyfið þeim að kólna.

Þeytið eggjahvítur þar til þær eru aðeins farnar að stífna. Bætið sykrinum út í. Hrærið í 1-2 mín til viðbótar

Hrærið saman í matvinnsluvél möndlur og flórsykur þar til möndlurnar eru fínt malaðar.

Setjið matarlit í eggjahvíturnar og blandið þeim svo við flórsykursblönduna.

Setjið deig í sprautupoka og sprautið út deiginu í litlar hringlóttar kökur á smjörpappír sem er á bökunarplötu. Látið þær standa í klukkutíma eða þar til það hefur myndast utan á þeim skel.

Hitið í ofnu við 150°c í 12-15 mín. (Kannski ögn lengur).

 

Vanillu appelsínukrem

• 1 dós (250 g) rjómaostur
• 1 vanillustöng
• 2 msk appelsínusafi
• 2 msk flórsykur

Skafið vanilluna úr stönginni (einnig hægt að nota 1 tsk vanilludropa). Blandið öllu hráefni saman og hrærið því vel saman.

Takið tvær makkarónur og setjið kremið á milli. Geymið í kæli.

Hér er mjög fín síða um makkarónur og hvað gæti betur farið ef eitthvað fer úrskeiðis.

Avacadoís og hundasúruís

Ég er búin að ráða mig sem ráðskonu í sveit í sumar, reyndar á eigin heimili en hingað til hef ég ekki gert annað en að baka, elda, þrífa, passa barnið og fæða hænurnar. En það er ekkert leiðinlegt við þetta hlutskipti. Reynar er þetta launalaust djobb en maður leggur nú heldur ekki verð á ánægjuna sem ég fæ út úr þessu.

Þegar ég fæ stund aflög þá leggst ég í matreiðslubækur og síður um mat á netinu, nóg er af matarbloggum, sérstaklega á ensku. Ég er búin að bookmarka svona 100 uppskriftir sem ég hef fundið á hinum og þessum vefsíðum og mig langar að prófa. Eitt af því var avacadoís.

Ég hef ekki verið mikið í ísgerð en það á eftir að breytast. Það tekur enga stund að skella í ís og maður getur haft uppskriftina misflókna.

 

Einöld grunnuppskrift af ís er t.d þessi:

Vanilluís

• 5 eggjarauður
• 5 msk sykur
• 5 dl rjómi, léttþeyttur
• 1 tsk vanilludropar

 

Þeytið saman egg og sykur. Bætið við léttþeyttum rjóma og vanilludropum og blandið varlega saman. Frystið. Hrærið í ísnum öðru hvoru á meðan hann er að frjósa.

Svo má bragðbæta hann, eins og t.d með hundasúrum sem smakkast mjög vel.

Þá maukaði ég lúku af hundasúrum með smá sykri með töfrasprota og 2-3 msk af mjólk þar til hann var orðinn að paste-i. Þá blandaði ég honum saman við 1/3 af vanilluísnum (miðað við uppskriftina hér að ofan). 2-3 lúkur af hundasúrum myndi þá duga í heila uppskrift.

Svo er hægt að gera nokkuð hollan ís. Ég prófaði það áðan og hann var svo góður að ég þurfti að hemja mig að borða hann ekki allan áður en ég frysti hann.

Avacadoís

• 1 avacado
• 1 banani
• 2 msk agave sýróp
• 2 dl rjómi, léttþeyttur
• Safi úr hálfri sítrónu
• 1/2 dl mjólk

 

Maukið saman í blender eða matvinnsluvél avacado, banana, mjólk, sítrónusafa og agave sýrópi. Létt þeytið rjóma. Blandið saman rjómanum og avacadoblöndunni. Frystið.

Einnig er hægt að skera avacado og banana í grófa bita, kreista yfir þá sítrónusafa og frysta. Og þegar ykkur langar í eitthvað hressandi og næringarríkt þá má skella þessu í blender með smá mjólk eða soya mjólk og úr verður fínasti sjeik.

Hvað er hægt að gera við 21 kg af rabarbara?

Þá er ég búin að ná í “smá” rabarbara. Ég og nágranninn sóttum nokkra stilka sem við skárum niður og gengum frá í frysti og þegar uppi var staðið vorum við með 21 kg.

Þá er bara að ráðast í það að finna skemmtilegar rabarbara uppskrifir til að nýta þetta c vítamín og járnríka grænmeti.

Aflinn kominn í hús.

Ég leyfi ykkur svo að fylgjast með hvað verður úr þessum frábæra rabarbara.

 

En hér er einfaldur réttur sem ég gerði því ég varð að nota spínatið sem ég átti inní ísskáp.

 

Wok the line

• 2-3 lúkur spínat
• lúka af kasjúhnetum
• humar ..eða rækjur
• 2-3 rif hvítlaukur
• 2-3 tsk rifinn ferskur engifer
• Sweet thai chile sósa, 1-2 msk
• 1 msk soya sósa
• 1 epli smátt skorið í teninga
• 1 lúka sesame fræ
• smá olia til steikingar

 

Steikið hvítlauk og spínat á pönnu (helst wok) í smá stund.  Bætið restinni saman við og látið malla þar til humarinn (eða rækjurnar) er eldaður.

Föstudagsfjör - Kúrbítspönnukökur

Nú er verið að plata mig, er í alvöru kominn föstudagur og vika síðan ég setti inn síðustu færslu, föstudagsgrín...
Nú jæja, ég hef gert fullt af færslum í höfðinu, en ekki gefist tími til að setjast niður og skrifa þær niður.

Tónlistin: Vinkona mín, Janie Price, gaf út skemmtilega plötu fyrir þó nokkru þar sem hún notar eingöngu selló og rödd.  Maður hefði þó haldið að á bak við hana væri heil hljómsveit.  Kíkið á þetta og segið mér, hefði ykkur dottið í hug að þetta væri spilað eingöngu með sellói?

Uppskrift af handahófi:  Pasta með hörpudisk og grillaðri papriku

Vín vikunnar: Ég var að smakka eitt af ódýrasta víninu í ríkinu, Solar de carrion og það smakkaðist rosalega vel, létt og ávaxtaríkt. Ég ætla að láta reyna á þetta vín aftur. 

Ég gerði mjög góðar pönnukökur um daginn.  Ég ætlaði að gera kúrbítsklatta en ákvað svo að gera einhverskonar pönnukökur og nota þær eins og crepes.
Þannig að ég fyllti þær með hrísgrjónum og grænmeti.

 

Kúrbítsklattar

• 1 kúrbítur, rifinn með grófari hliðinni á rifjárninu
• 2 dl hveiti
• 1 tsk matarsódi
• 1 tsk salt
• 1 egg
• 1-2 dl mjólk
• 2 msk matarolía

Rífið kúrbítinn, leggið hann í sigti og þerrið hann aðeins með viskastykki eða eldhúspappír. Saltið hann.  Hrærið saman mjólk, hveiti, egg og matarsóda. Bætið kúrbít við. Blandið vel saman.
Eldið á pönnu eins og þið gerið pönnukökur.  Ég nota teflonhúðaða pönnu.
Fyllið svo með einhverju góðu, eins og t.d hrísgrjónum, osti, papriku, vorlauk og sinnepssósu.
Sinnepssósa: Dijon sinnep, smá sætt sinnep og sýróp.  Öllu hrært vel saman.

Svo rúllaði ég upp kökunum, dreifði smá af osti, papriku og vorlauk ofan á og setti í ofninn í nokkrar mín.
Það er mjög gott að blanda einhverju grænmeti við pönnukökudeig. 

Mynd vikunnar:  Ég hef undanfarið skellt mér í göngutúra um hverfið á morgnana, það er alveg frábært.  Ég er ein af þeim sem fer aaaaldrei í göngutúra, og þá síst af öll eldsnemma á morgnana, þar til núna.  Fátt betra en að vakna snemma og fara út í hálftíma göngutúr hér í sveitinni áður en maður byrjar á verkefnum dagsins.

Í gær mætti ég risastórum krumma.

Föstudagsfjör

Tónlist vikunnar er lag með boxaranum knáa,Oscar de la Hoya, svona í tilefni 17. júní.  Myndbandið er ekki síðra en lagið, if you get what I mean...en ég verð nú að segja að mér finnst skemmtilegra að horfa á hann í hringnum, þó svo að ég elski þessa á hlið á honum líka, hvernig er það ekki hægt!

 

Uppskrift vikunnar er uppskrift síðustu færslu, eða smokkfisksamloka. Og þá líka sósan sem er á henni.  Ég gerði hana aftur um daginn og bar hana þá fram með lambaborgara, ekki var það verra.

 

Vefsíða vikunnar er koolandkreativ.  Það er íslensk kona sem heldur úti þessari síðu og hver einasta færsla er eftir mínu höfði, þannig að hún er sem sagt mjöööög smekkleg :)

 

Vín vikunnar er Celeste, Crianza, Torres, 2007 frá Spáni.

 

Uppskrift af handahófi: Það skemmtilega við uppskriftir af handahófi er að stundum dett ég niður á uppskriftir sem ég hef skrifað fyrir margt löngu og það er gaman að rifja upp það sem ég hef verið að röfla hér áður fyrr. En Svartbaunasúpa varð fyrir valinu að þessu sinni.  Ég er sjúk í svartar baunir og borða þær yfirleitt í morgunmat með over easy eggi. 

 

Mynd vikunnar er af þessum rosalega flotta hundi sem varð á vegi mínum í Salamanca á Spáni.

 

Dog walks into a bar...

 

 

Gleðilega hátíð!

Smokkfiskssamloka

Ég er ekki mikið fyrir smokkfisk, aðallega því mér finnst ég oft fá seiga bita og það er fátt leiðinlegra en að borða mat sem þarf að tyggja endalaust.

En kærastanum finnst smokkfiskur mjög góður og því ákvað ég í tilefni af afmælisdegi hans að elda eitthvað úr smokkfisk. 

Ég rakst á uppskrift í blaði sem var tileinkað samlokum og þar á meðal var smokkfisks samloka sem hljómaði mjög spennandi.  Ég hafði hana til hliðsjónar þegar ég bjó til þessa, sem var rosalega góð og ekkert ólseigt við smokkfiskinn að þessu sinni.

Galdurinn hér er ferskt fennel og slatti af fersku basil og kóríander ásamt alvöru mæjónesi, ég nota eiginlega aldrei mæjónes, en það var rosa gott hér og ég mæli með því.

Smokkfiskssamloka (fyrir 2)

• Gott baguette eða annað samlokubrauð (ciabatta t.d)
• 1/2 bolli mæjónes
• 1-2 msk Sriracha hot sauce
• 1 tsk mulinn þurrkaður chili
• 1 msk matarolía og slatta í viðbót til að djúpsteikja úr
• 2-3 rif hvítlaukur
• 1/2 græn paprika
• 2 smokkfiskar (1 pakki)
• Bjórdeig (1 dl hveiti og slatta af bjór)
• 1 góður vöndur af  fersku basil
• Slatta af fersku kóríander
• Agúrka, skorin langsum í þunna strimla
• 1/4 fennel, skorið í þunnar sneiðar langsum
• 1 lime
• Salt og pipar

Dágóður hráefnislisti, en ekki svo flókin eldamennska.

Sósan:Hrærir saman mæjó, sriracha sósu og chiliflögunum.  Setjið í kæli.

Hitið olíu á pönnu, 1 msk eða svo og mýkið papriku sem þið hafið skorið í þunna strimla og svitið hvítlauk. (Hér mætti setja út í 1 msk af fiskisósu, en ég gerði það reyndar ekki).  Takið pönnuna af hellunni og setjið til hliðar.

Hitið olíu í potti til djúpsteikingar

Bjórdeig:Setjið dl af hveiti í skál og hellið saman við bjór þar til þið eruð komin með deig sem svipar til vöffludeigs.  Skerið smokkfiskinn í sneiðar svo úr verða hringir.  Dýfið honum í bjórdeigið og djúpsteikið. Það fer eftir hita olíunnar og svona hversu lengi þið þurfið að steikja fiskinn, en ég miðaði við þar til deigið var gullinbrúnt, eða um eina mínútu kannski ein og hálf.

Takið smokkfiskinn úr olíunni og setjið á disk með eldhúspappír.

Ég skellti mínu baguette í panini grillið.  Svo smyr ég smá mæjósósu á báða helminga brauðsins, skelli þar ofan á paprikunni, fennel, agúrku, kóríander og basil. Toppa þetta með djúpsteikta smokkfisknum. Lime sker ég í þunna litla bita og dreifi þeim ofan á fiskinn. Restina af lime skar ég í báta og bar fram með samlokunni.  Saltið og piprið eftir smekk.

Sriracha sósan er sterk chili sósa, ég veit ekki hvort hún fæst hér, en að væri á helst í asísku búðunum. Mér finnst nú samt eins og ég hafi séð hana einhversstaðar, þetta er svo vinsæl sósa.  Í staðin fyrir þessa sósu væri hægt að nota einhverja chilisósu, en þó ekki súrsæta.  Og jafnvel smá dropa af tabaskó ef þið eruð ekki með sterka chilisósu.