Brilliant réttur fyrir litlu frosnu rækjurnar sem maður á stundum í frysti...

Einstaka sinnum á ég poka af frosnum rækjum í frysti, mér dettur sjaldan nokkur í hug í hvað ég get notað þær nema þá í rækjusalat með mæjónesi.  Þar til um daginn, þá var ég að ráfa um netið og satt niður á svo girnilegan rétt, en þar var reyndar notaðar einhverjar fínar hráar rækjur.

Ég ákvað því að heimfæra þennan rétt upp á gömlu góðu mæjónesrækjurnar og hann endaði á að smakkast dúndur vel.

Þessi réttur hljómar kannski undarlega en ég segi það og skrifa, þetta var ofboðslega gott.

Djúpsteikt rækjubrauð

• Brauðsneiðar án skorpu, franskbrauð t.d eða annað hvítt brauð
• 1/4 poki frosnar rækjur
• Vorlaukur, 1 eða 2
• 1 egg
• Salt og pipar
• Ferskt rifið engifer, 2-3 msk
• Sesamfræ
• Olía til steikingar

Skerið brauðið í þríhyrninga, eins marga og rækjumaukið dugar á.  Ef þið eruð með formbrauð skerið skorpuna frá og brauðið í 4 ferhyrninga.

Blandið saman í blender eða matvinnsluvél rækjum, einu eggi, engifer, salti og pipar.  Maukið. Setjið maukið í skál og blandið við það smátt skornum vorlauk.

Smyrjið þessu á þríhyrningana, um það bil 1 matskeið á hvern þríhyrning.  Stráið yfir þá sesamfræjum, svörtum (ef þið eigið til) og ljósum.

Djúpsteikið í 1 mín með rækjuhliðina niður fyrst.  Snúið sneiðunum  við og steikið í 1/2 - 1 mín til viðbótar.  Leggið á eldhúspappír til að þerra mestu olíuna. 

Ég prófaði líka að setja maukið í hrísgrjónapappír og djúpsteikja, það var einnig mjög gott.

 

Nú er ég á fullu að undirbúa sýningu, en ég verð með opnun á fimmtudaginn milli 17.00-19.00 og allir eru velkmomnir.

Sýningin er í Skotinu hjá Ljósmyndasafni Reykjavíkur, Tryggvagötu 15, 6.hæð.  (Sama hús og Borgarbókasafnið).

Athugasemdir

[Nanna Gunnarsdóttir (IP-tala skráð) 18.10.2011 kl. 13:43]

Geysilega girnilegt... Einu sinni fann ég hálfan svona rækjupoka í frysti, lét þiðna og reif í matvinnsluvél saman við fiskhakk, kryddaði með austurlensku kryddi, hvítlauk, kóríander, lime, engifer og setti egg og brauðrasp saman við og úr urðu dýrindis fiskbollur, litlar og nettar, sem hentuðu listavel í forrétt með einhverri dýfusósu sem ég man nú ekki í svipinn, mjög trúlega hefur hún nú verið með hvítlauk í... Það er ótrúlegt hvað maður getur nýtt svona hluti sem maður finnur hjá sér í skotum og kirnum...

[Soffía Gísladóttir, 26.10.2011 kl. 21:09]

Mmmm, hljómar vel, prófa það næst þegar ég geri fiskibollur.