Hveiti

Ég fékk mjög gott hveiti hjá Frú Laugu. Ekki það ódýrasta í bænum en það er lífrænt ræktað og steinmalað af fjölskyldufyrirtæki í Piemonte á Ítalíu. Mér fannst mjög gott að baka úr því.  Ég prófaði bæði fínt og hart hveiti.

 

Hjónin í Frú Laugu bentu mér á að prófa að nota 50/50 af hörðu og hvítu hveiti við pizzabakstur og það kom vel út. 

 

Ég skellti líka í nokkur brauð sem smökkuðust vel með að dýfa í smá af ólífuolíunni frá Sikiley og Maldon salt.

Næst ætla ég að prófa að gera þetta brauð.

Og fyrir þá allra hörðustu í samsæriskenningunum þá er hér grein um hveiti. Hvað er satt eða logið veit ég ekki. Ágætt er að lesa allt með fyrirvara og fylgja eigin sannfæringu.

Það er eflaust meiri fróðleikur um hveiti í þessari bók, White bread, sem er einmitt á listanum mínum yfir lesefni sumarsins.

Ég veit bara að ég get ekki sagt skilið við hveiti.  Pizza, brauð, pasta...svo yndislega gott.  Þá kaupi ég líka bara þau hveiti sem mér finnst girnileg og borða með góðri samvisku.

Einfalt hvítt brauð - galdurinn er að láta það hefast saman

Ástæðan fyrir öllum þessum uppskriftum mínum af hvítum brauðum er að ég kaupi ekki brauð í búð og stundum vantar manni svona hvítt brauð hér í sveitinni fyrir gesti og gangandi.

Þetta er eiginlega bara pizzadeig með olíu.  En hlutfölling til að fá fínasta hvítt brauð eru mjög góð.  Fullkomið brauð til að sneiða niður og bera fram með súpu eða pasta.

En þegar þið mótið úr því brauðlengjur eða bollur, látið þær vera nálægt hvor annari svo þær hefist saman í seinni hefun þegar þær eru komnar á ofnplötuna.

 

Hvítt brauð

• 1/2 L volgt vatn
• 3 tsk þurrger
• 12-14 dl hveiti
• 1/2 dl olía
• 2 msk sykur

Blandið öllu saman í kitchen aid (bætið hveitinu við eftir þörfum) og hnoðið rosalega vel.  Látið hefast í 1-2 klst.  Sláið niður og skiptið deiginu í 4 eða 5 "subs", þ.e svipuð stærð og lag og brauðin á Subway.  Raðið fremur þétt á ofnplötu. 

Leyfið þeim að hefast undir klút í hálftíma. Brauðin mega snertast þegar þau eru búnir að hefast, það má svo rífa þau í sundur þegar þau koma úr ofninum.

Bakið í ofni í ca 15 mín eða þar til þau hafa bakast í gegn.

 

Ég notaði þetta brauð í smokkfisksamlokuna og það var mjög gott.  Ég þynnti það aðeins með að sneiða úr því langsum.

Munið bara að nota vel af ferskri basil og kóríander og fullt af chile-hvítlauksolíu sem hljóðar svona:

Chile- hvítlauksolía

• 3-4 Hvítlauksrif
• 2 Chile piprar
• 1 dl Jarðhnetuolía
• Smá salt 

Skerið hvítlauk og chile pipar í þunnar sneiðar.   Setjið olíu á pönnu við miðlungs hita og bætið út í chile og hvítlauk.  Látið malla í nokkrar mín, passið bara að laukurinn brenni ekki. Saltið eftir smekk.

Takið af hellunni og látið kólna.  Setjið olíuna í skál og berið fram með einhverjum dásemdar réttinum, í mínu tilfelli, smokkfisksamloku. 

Eldhúsbréf

Hér eru nokkrar fyrir og eftir myndir af eldhúsinu. Loksins er búið að tengja fyrir mig gashellurnar mínar. En hvað það er gaman að vera komin með gashellur. Það hafa verið þó nokkrar framkvæmdir í eldhúsinu undafarið.

Ég datt niður á mynd sem ég tók af eldhúsinu þegar það var mjög hrátt og allt þar inni tímabundið.

Allar hillur og eldhúsbekkurinn eru úr mótatimbri og gamalli hurð.  Gamla hurðin, enn með hurðarhúninum er enn notuð sem eldhúsborðplata, það er mjög sætt en ekki mjög praktískt þegar kemur að þrifum þannig að því miður mun hún víkja fljótlega fyrir flísalagðri borðplötu.

 

Sú mynd minnti mig á að vera dugleg að taka myndir af þróuninni, það er nefnilega gaman að fylgjast með eldhúsinu mótast og verða svo loks eins og ég vil hafa það.

Ég hef verið dugleg að safna hugmyndum á pinterest "mood board" ið mitt. Það var fyndið að sjá hvað ég hef líka verið dugleg að fylgja eftir þeim hugmyndum sem ég hef fundið og líkað.

Sérstaklega fannst mér sniðugt þegar ég fattaði að ég var greinilega undir miklum áhrifum frá þessari hugmynd.

 

Eins og sést kannski hér á hilluberum, hillum og ljósinu : )  Við ákváðum að skella á vinarlegum grænum lit á vegginn í staðin fyrir hvíta sem fyrir var. Það gerir þetta meira sveitó, svona fyrst við erum í sveitinni.

 

Svo fann ég þessa bleiku hillu, liturinn var nú ekki það sem heillaði  mig, heldur vantaði mig svona diskarekka.  Þannig að ég hugsaði sem svo að það er hægt að mála, en ég ætla að leyfa hillunni að vera bleikri þar til ég fæ leið á þvi.

Svo vantar bara diska í hilluna.  Þessir einlitu hvítu sem ég á voru ekki að dansa þannig að þetta fær að vera kryddhilla þar til ég finn mér fallega diska.

 

Eldhúsið er enn í vinnslu, það verður tekinn skurkur um næstu helgi og þá get ég tekið betri myndir og frá sama sjónarhorni og efsta myndir hér.

Páskarnir eru bara einu sinni á ári...Berja-Sorbet

Maður heyrir oft, "en þetta er bara einu sinni á ári".  Ég hef staðið mig að þvi að segja þetta of oft undanfarið!  Það eru jól og páskar og sumardagurinn fyrsti og afmæli og sumarbúðstaðarferð, sprengidagur, bolludagur, öskudagur og og og... 

Úr varð að ég hef ekki keypt sælgæti síðan um páskana!

Önnur vinsæl setning hjá mér er:  Það er í lagi að leyfa sér þetta endrum og eins, orð að sönnu en þá þarf maður líka að hafa góða skilgreiningu á "endrum og eins".

Ég hef verið að nota frosin ber í ýmislegt undanfarið.  Ég bý reglulega til "sultu" eða sýróp eða þá sorbet.  Ég hef ekki keypt sultur út í búð lengi.  Hér stjórnar maður sykurmagni og maður getur notað ýmis önnur sætuefni eins og t.d döðlur.

Það eru svipaðar aðferðir við þetta en svo fer ég að þegar ég geri Sorbet.  Þetta er eitthvað sem maður getur leyft sér endrum og eins...

 

Berja-Sorbet 

• 3 bollar frosin ber
• 1 bolli sykur
• 2 bollar vatn
• Safi og zest af sítrónu
• 3 msk appelsínusafi

 

Blandið öllu í pott og látið suðu koma upp.  Lækkið hitann og leyfið malla í 10 mín.  Setjið þetta í blender og maukið. Sigtið mestan vökva frá.  (Geymið vökvann sem þið sigtið inn í  ísskáp, það er gott sýróp). Látið blönduna í ílát sem þolir frost og inn í frysti í a.m.k 3 klst.

Ég er ekki með ísvél þannig að þetta verður harður klumpur og því gott að taka hann út úr frysti örlítið áður en þið ætlið að bera hann fram. 

 

Sömu uppskrift er hægt að nota sem sultu og sleppa því að setja þetta í frysti og ég set hana ekki í blender, heldur bara beint í ísskáp.  Þetta mun ekki hlaupa eins og sulta en er rosalega gott, og frábært með pönnukökum og rjóma, sem maður leyfir sér endrum og eins. 

Bækur tengdar mat og matarpólitík (þó ekki uppskriftabækur)

Það er eins gott að ég á ekki sjónvarp, því það er nóg lesefni framundan. Ég er búin að vera að sækja mér "sample" af hinum og þessum bókum hjá Amazon á kindle-inn minn.

Allt bækur sem tengist mat á einhvern hátt. Svona "sample" eru bara 1 eða 2 kaflar þannig að ég fékk valkvíða þegar kom að því að ákveða hvaða bók ég ætti að fá mér því mig langaði að lesa þær allar.  

En ég er komin að niðurstöðu og ætla að fjárfesta í bók sem heitir Animal, Vegetable, Miracle og er um fjölskyldu sem flytur upp í sveit og tekur eitt ár í að lifa á eigin uppskeru og því sem fæst í þeirra nánasta nágrenni.

Aðrar bækur sem rötuðu sem "sample" á Kindle-in og mér þóttu áhugarverðar voru:

• American way of eating
• Extra Virginity
• White bread
• Chop Suey 
• An Economist gets lunch
• Tomatoland
• Taco USA

 

Lífið í sveitinni var gott um helgina, sumarið fór vel af stað.  Blankalogn var í firðinum góða frá því á Sumardaginn fyrsta og alla helgina .  Hafgolan lét ekkert sjá sjá sig. 

 

Á Sumardaginn fyrsta sáum við að það snjóaði í fjallinu á móti.  Það fundu örfá snjókorn sér leið yfir til okkar, en það er bara við hæfi á þessum fyrsta degi sumars. 

 

 

 

En svo var það bara sól og blíða það sem eftir var.

 

 

 

 

Beef dip og ólífuolíuskandallinn

Hafið þið ekki heyrt um ólífuolíu skandalinn hér fyrir nokkrum árum, þar sem extra virgin ólífuolía er ekki hrein ólífuolía heldur oftar en ekki bara ódýrasta olían sem finnst (ekki einu sinni ódýrasta ólífuolían, bara hvaða olía sem er) blönduð við jafnvel annan flokks ólífuolíu og með litarefni og bragðefni.

Það er talað um að um 70% af öllum Extra virgin ólífuolíum í hillum stórmarkaða séu ekki 100%. Ég var að reyna að googla nokkrar tegundir og las á einhverju bloggi að Olitalia sé ekki með hreina ólífuolíu. Það á nefnilega líka við um FLESTAR af þeim olíum sem finnast í búðum hér heima.

Hér er listi yfir ólífuolíur sem eru ekki 100% og þær sem stóðust prófið.  Allar þær sem féllu á prófinu fást hér heima, en ég kannast ekki við neina af þessum sem stóðust það.

Hér er rannsóknin og niðurstöður.

Svo var skrifuð var heil bók um málið sem væri gaman að lesa

Hér er smá lesning en ég held það sé ekki hægt að finna betri upplýsingar um ólífuolíu á einum stað en hér

Og fyrst ég er að henda inn öllum þessum linkum á annað borð þá væri gaman að kíkja nánar á þessa síðu.

 

Ef þið viljið góða ólífuolíu þá mæli ég með Frú Laugu. 

Ég treysti þeim. Þeir eru með stóran dúnk af lífrænni olíu frá Sikiley sem mér finnst mjög góð.  Þá kemur maður með sína eigin flösku sem maður fyllir á.

Það eru margir þekktir skandalar í matarheiminum. Hér er búið að taka þá saman í eina bók. Það er bara sorglegt að geta ekki treyst fólki til að gera hlutina samviskusamlega.

Ég tala nú ekki um þegar verið að vega að ungum börnum eins og þegar upp komst um mjólkurformúluna í Kína. Þar hafði einhverjum skít verið bætt við formúluna svo hún virtist próteinríkari. Börn dóu eða urðu mjög veik. 

Það er bara ekkert skrítið að maður er skeptískur á mat og kaupir ekki hvað sem er þegar allt snýst um að græða og græða meira svo það bitnar á framleiðslunni.

En á léttari nótum...

GLEÐILEGT SUMAR! 

 

Ég ætlaði að gera hefðbundna beef dip samloku um daginn en var ekki með nógu gott kjöt til þess. Það þarf alvöru roast beef þar.

Þannig að ég blandaði saman tveim uppskriftum því ég var að elda flatan klump sem á það til að verða svolítið þurr við ofneldum. Hann hentar víst ekki vel í ofninn, en það er mælt með þvi að steikja hann á pönnu.

Þannig að ég kryddaði hann frekar spicy og endaði svo á að sjóða hann aðeins í soðinu eftir að ég skar hann í þunnar sneiðar. Þetta endaði sem sagt á því að vera ágætis kjöt og það sem eftir var daginn eftir var étið upp til agna af nautabóndanum sjálfum.

 

Hálfgert Beef dip

• Klumpur
• Oregano, 2 msk
• Heitt pizzakrydd frá pottagöldrum, 1 msk
• Salt, eftir smekk
• Pipar , eftir smekk

Nuddið helminginum af kryddblöndunni á kjötið, lokið því á þurri pönnu á öllum hliðum.

Setjið kjötið i ofnskúffu.

Eldið í 20 mín við 220°c. Lækkið hitann niður í 200°c og bætið við 1 l af vatni og rest af kryddblöndu í ofnskúffuna.

Skerið kjötið þunnt.  Setjið soðið úr ofnskúffunni í pott og sjóðið kjötið í soðinu í smá stund ef kjötið er þurrt. 

Berið þunnt skorið kjötið fram með soðinu, ítölsku sub brauði, papriku sem þið hafið skorið i strimla og soðið í korter. og jalapeno.

 

 

Enn eitt brauðið, og ekki af verri endanum. Brilliant með brönsinum

Nú las ég að verið sé að gera tilraunir með að auka D vítamín í sveppum hjá Flúðasveppum.

Ég fór aðeins að googla um D vítamín í sveppum og rakst á þessa grein á heillheimur.is.

Hér má lesa aðeins meira um sveppi og D vítamín

Mér finnst bara eitthvað ónáttúrulegt að vera sífellt að breyta mat, en kannski er það bara náttúrulegt fyrst þróunin er þessi og tæknin til staðar.

Ég mun þó halda mig við kjöt án ómega og sveppina sem hafa ekki verið D vítamínbættir og fá mér þá frekar lax með sveppunum til að fá D vítamínið.  Ég hef fulla trú á að nóg sé af næringu í fjölbreyttu mataræði.

Ég hef verið dugleg við að gera heimagerð brauð.  Ég prófa gjarnan nýjar uppskriftir hvað varðar hlutföll og hvort ég noti egg, mjólk og smjör í degið eða hvort ég geri brauð úr pizzadeigi.

Ég fann uppskrift  sem bar titilinn FEATHER LIGHT ROLLS.  Feather light hljómaði vel í mínum eyrum enda er maður alltaf að leitast efir því að gera létt og loftrík brauð.  

Ég var mjög sátt við þessa uppskrift.  Brauðið var bakað í potti, en potturinn þarf að vera Cast iron, enamel eða keramik og ég mæli með því að baka í potti og hafa lokið á.

 

Laufléttar brauðbollur 

• 1 msk ger
• 1 1/4 bolli volg mjólk
• 1/4 bolli sykur
• 1/4 bolli matarolía
•  2 stór egg
• 3 1/2 bolli hveiti
• 1 msk salt
• 4 msk smjör 

Blandið saman geri, mjólk, sykur, olíu og eggi í skál.   Bætið við 2 1/2 bolla af hveiti og látið vélina vinna í eina mínútu.  

Bætið við saltinu og restinni af hveitinu smám saman þar til áferðin er orðin góð.  Hrærið í hrærivél í smástund, eða hnoðið með höndum.  

Mótið kúlu úr deiginu, setjið í stóra skál, breiðið yfir hana röku viskastykki eða plasti og látið hefast í 1-2 klst.

Skiptið deiginu í kúlur á stærð við tennisbolta, ég gerði 8 kúlur. Setjið kúlurnar í pottinn, eina í einu og rúllið þeim upp úr smjörinu sem er í pottinum.

Lokið pottinum og látið deigið hefast, ca 40 mín.

Þegar deigið er búið að hefast bræðið þá smjörið í pottinum sem þið ætlið að baka það í og veltið pottinum svo smjörið leiti upp á hliðarnar.  Eitthvað af smjörinu liggur svo eftir í botninum á pottinum, það er gott. 

 Hitið ofinn í 180°c.  Setjið pottinn í  ofninn og bakið í 20 mínútur.  Takið lokið af pottinum og bakið í 10 - 15 mín til viðbótar.

Ekki vera að opna ofninn að óþörfu og sífellt kíkja á brauðið á meðan það er með pottlokið. Það lengir eldunartímann.

Takið pottinn úr ofninum, takið brauðið úr pottinum, þökk sé smjörinu þá er það lítið mál.

Eins og alltaf þá eru þessar lang lang bestar enn volgar úr ofninum. 

Húsið við sjóinn

Ég var að lesa grein um daginn í blaði, skrifuð af dálkahöfundi í Country Living.  Hún býr í sveit og allt er svo rómantískt sem hún skrifar um um sveitina sína, eina pöbbinn, hanagal, samheldnir nágrannar, maturinn beint af býli og svo framvegis.  Ég fór að öfunda hana og hugsaði með mér hvað það væri gaman að búa svona og sá þetta alveg fyrir mér.  Ég sá þetta eiginlega einum og vel fyrir mér.  Þá rann það upp fyrir mér, bíddu aðeins.  Ég bý svona. 

Húsið við sjóinn

 

 

 

 

Ég heiti Soffía og hef verið að blogga um mat á mbl.is blogginu síðan 2008.  

Að mennt er ég myndlistarmaður, útskrifaðist frá myndlistardeild Listaháskóla Íslands 2001 með grafík sem sérsvið.  Eftir listnámið hef ég ferðast víða,  ásamt því að hafa búið á Spáni, í Kaupmannahöfn og Kamloops í Kanada.  Ég stundaði nám í margmiðlun þar sem var lögð áhersla á hreyfimyndagerð. Ég hef haldið þónokkrar einka og samsýningar bæði hér heima og erlendis. Ég hef búið á Íslandi síðan 2009 og síðustu tvö ár hefur tveggja ára dóttir mín átt hug minn allan.

Ég hef verið að byggja mér heimili við sjóinn í sveitinni.  Þar get ég sameinað mörg áhugamál, ræktað mitt eigið grænmeti, slakað á í fallegu umhverfi með fjölskyldunni, horft á hafið á meðan ég blaða í gegnum matreiðslu og híbýlablöð, innréttað heimilið mitt eftir mínu höfði og spáð og spekulerað endalaust í innanhúshönnun, húsgögnum, innréttingum, flísum og fleiru skemmtilegu. Og síðast en ekki síst tekið á móti gestum og eldað ofan í þá.

Eldhúsið er hjartað i heimilinu, það tekur sífelldum breytingum.  En það hefur alltaf verið hjartað, líka þegar ekkert var þar nema lítill sumarbústaðarofn á gólfinu og gamalt ikea skrifborð sem matarborð.  Alltaf var hægt að töfra fram eitthvað gott.

Í vor (2012) mun eldhúsið loks taka almenninlegum breytingum og fara að líkjast endanlegri útkomu.  Ég hef skoðað mikið af blöðum og verfsíðum til að fá hugmyndir.  Og ég held ég sé nokkurnvegin að detta niður á það sem ég vil.  Fyrir þá sem vilja þá er hægt að skoða “mood board” sem ég gerði um mitt draumaeldhús á pinterest vefnum hér.

 

Ég bý í húsi upp í sveit við sjóinn, landið í kringum húsið mitt er þakið krækiberjum á haustin.  Í þessu húsi bý ég með besta fólki í heimi.

Ég vakna nú ekki við hanagalið hjá hænsnabóndunum fyrir neðan, en stundum heyrir maður mjóróma galið í honum.  Og þangað fer ég með alla matarafganga þannig að ég hef aldrei áhyggjur yfir að þurfa að henda mat og þar fæ ég egg, nýorpin, “free range” “organic” egg.  Og stundum fær maður sér rauðvínssopa með hænsnabændunum.

Ofar við veginn búa svo bændurnir, vinir okkar.  Þar reka þau nautabú og litla sælkeraverslun með dásamlegum heimagerðum afurðum.  Þarna fæ ég besta kjöt í heima, beint af býli.  Stundum eldum við saman og og fáum okkur rauðvínssopa.

Við hliðina á okkur búa svo okkar bestu vinir.  Æskufélagarnir, maðurinn minn og vinur hans hafa verið samtaka, fundu sér  dásamlegar, listmenntaðar kærustur sem kunna til verka í eldhúsinu, eignuðust stúlkubörn á nákvæmlega sama tíma og byggðu sér hús hlið við hlið….í sveitinni.  Góðir grannir og æskuvinir.  Og stundum bjóða þeir upp á rauðvínssopa.

Það er nú ekki langt að fara á sveitapöbbinn ef manni langar að lyfta sér upp og þar hittast sveitungar gjarnan við ýmis tækifæri.  Einnig eru sveitungarnir iðnir við að slá upp matarveislum fyrir alla þá sem vilja.  Ekki amalegt það fyrir matgæðina eins og mig.

Í sjónum fyrir neðan er spriklandi ferskur kræklingur, ýsa og þorskur.  Berin allt um kring á haustin og matjurtagarðurinn blómstar á sumrin.

Báturinn okkar stóð við bryggjuna, á honum fórum við í skemmtiferðir með vinum og veiddum okkur fisk í soðið á spegilsléttum firðinum.

Fátt er notalegra en að fara á ströndina og leggjast í heitan sandinn, en ströndin er heit af náttúrunnar hendi sem og lítil laug sem er staðsett í fjörunni.  Ófáum stundum höfum við eitt þar í miðnætursólinni á sumrin og við stjörnubjartan himinn að vetri til.

Svo á ég yndislegt eldhús og nóg af plássi til að taka á móti öllum góðum vinum úr borginni sem koma í “bed & breakfast” og smá rauðvínssopa.  SKÁL!

 

 

Hér má finna uppskriftirnar mínar flokkaðar og með "TAG" og því auðveldara að finna þá uppskrift sem maður er að leita að :

 

 

http://husidvidsjoinn.wordpress.com 

Besti eftirréttur sem ég hef smakkað langa lengi, kókós desert

Þetta er einn besti eftirréttur sem ég hef smakkað. Ég smakkaði hann fyrst hjá bóndakonunni á Hálsi og fékk að sjálfsögðu uppskriftina.

Ég lét svo vaða í að prófa hann núna um páskana, sem eftirrétt á Páskadag.  Ég var með svo miklar væntingar og vissi svo sem ekki hvort hann yrði jafn góður hjá mér.  En, ég fylgdi uppskriftinni samviskusamlega og hann varð alveg jafn góður og sá sem lifði í minningunni.

Þannig að þessi uppskrift er skotheld og ég algjörlega gjörsamlega mæli með því að þið prófið þennan eftirrétt. Hmmmm, það sakar ekki að prófa! 

 

 

Svona fallegur var eftirrétturinn hjá húsfrúnni á Hálsi  

Kókós desert

 

• 400 ml kókósmjólk í dós
• 30 g kókósmjöl
• 120 g sykur
• 3 gelatin blöð
• 400 ml rjómi
• 2 msk ferskur sítrónusafi
• 10 g vanillusykur (eða 1 tsk vanilludropar) 

Kókósmjólk, kókósmjól, sykur, vanillusykur og sítrónusafi sett í pott og fengin upp suða.  Takið pott af hellu og látið standa í 5 mín.

Setjið kókósmjólkurblönduna í skál og bætið gelatíni við og hrærið því vel saman við, látið kólna í 40 mín.  (Það er hægt að kaupa gelatín unnið úr plöntum!)

Þeytið rjómann og blandið honum saman við herlegheitin. 

Kælið inn í ísskáp í a.m.k 2 klst

Berið fram með rifsberjasósu eða einhverri góðri berjasultu. Svo er hægt að skreyta hann með rifnu góðu súkkulaði og blæjuberjum.

 Ég notaði þessa uppskrift af sultu með.

 

 

Skógarberjasulta

 

• 2,4 dl blönduð ber (frosin) ég notaði berjablöndu, jarðaber, hindber, bláber ofl.
• 1/2 bolli sykur
• 1/2 dl vatn 

 

Allt sett í pott og leyfið suðu koma upp.  Látið þá malla við meðal hita í 10 mín.  Setjið sultuna í skál og leyfið henni að kólna.  Ef þið viljið hana hana maukaða þá skellið þið henni í blender (eða maukið með töfrasprota) 

 

Hversdagslífið tekið við og 45 krydda blandan

Ég vona að þið hafið fengið ykkur páskaegg með góðri samvisku þetta árið því það er svo hol(l)t að innan.  Er það bara ég eða spændust þessi egg upp eitthvað fyrr en í gamla daga.  Ég man þegar maður var lítill þá gat maður verið að maula á einu eggi alla páskana.  Nú setti ég brotið eggið á disk og það var horfið áður en ég gat lesið málsháttinn.  

Við vorum svo heppin að eyða páskadeginum með nágrönnum okkar hér í sveitinni. Fyrst var farið í brunch til bændanna.

Þar eru skemmtilegir siðir sem húsfrúin kom með sér frá Sviss, þaðan sem hún er. Fyrri siðurinn er að bjóða upp á freyðivín eða Mimosa, ekki slæmur siður það og hinn er einhverskonar eggjaleikur.

 

Hún litar eggin með náttúrulegum litum, sýður þau með t.d lúsum eða laufum og fær þannig á þau mjög fallega liti. Þessi egg eru ekki hol að innan heldur eru þau soðin í öllu sínu veldi og síðan borðuð. En leikurinn er sá að tveir skella saman eggjum sínum og ef eggið þitt brotnar ekki þá máttu ekki borða það fyrr en einhver annar er með egg til að skella saman við þitt egg þar til það brotnar.

Brunchinn var svo ekki af verri endanum.  Margt girnilegt í boði, enda miklir matgæðingar hér á ferð, professional matgæðingar sem reka nautabú og sælkeraverslunina Matarbúrið hér í Kjós.

 

Það sem mér fannst sérstaklega spennandi var nautatungan.  Hún var svo meir og bragðgóð, alveg lungamjúk, eða ætti ég að segja tungumjúk?

Svo var farið heim og slakað á því ekki þurfti ég að sinna kvöldmat heldur.  Nágrannarnir hér við hliðina á okkur komu nefnilega í heimsókn kvöldið áður og tóku með sér lambalærið mitt þegar þeir fóru.

Þau lumuðu á allskyns marakóskum  kryddum og vildu bjóða okkur í páskamat. Þessir nágrannar eru einnig listakokkar (voðalega er ég heppin með nágranna, allir snillingar í eldhúsinu og hafa gaman að þvi).

 

Úr varð að þau tóku lærið því fátt fer betur saman en marokkósk krydd og lamb.  Og ekki sé ég eftir því.  Lambið smakkaðist ótrúlega vel og meðlætið var brilliant og félagsskapurinn draumur einn, því fyrir utan nágrannana í næsta húsi komu líka bændahjónin sem buðu okkur í brönsinn.

Eins og góðum kokki víst sæmir þá var ekki farið eftir neinni sérstakri uppskrift og kryddin sem voru notuð fást ekki hér, en þar var m.a ilmandi cumin og kryddblanda sem nefnist 45 krydda blandan.

Í Marakkó er hver kryddsali með sína eigin "45 krydda blöndu" sem getur þó innihaldið allt að 100 krydd.   Þessi blanda nefnist Ras el hanout og er blandað saman af bestu kryddum salans.

Það er smá lesning um Ras el Hanout á wikipedia. 

 

Einnig fór í pottinn sæt kartafla og laukur.  Meðlætið var svo kryddaðar sveskjur, lambasoðið, kartöflur og jógúrtsósa.  Ég sá um að gera sósuna og reyndi að hafa hana í marókóskum stíl.  Því miður átti ég ekki myntu, en myndi eflaust bæta henni við næst svona upp á stílinn.

Magnið í þessari uppskrift er ekki svo nojið. Ég mæli með að þið smakkið hana til.   

 

Jógúrtsósa 

• Grísk jógúrt
• Rifin agúrka 
• Rifinn sítrónubörkur
• Ferskur sítrónusafi
• Fersk mynta
• Hvítlaukur 
• Salt
• Smá pipar

Öllu blandað vel saman í skál.  Rífið agúrkuna með rifjárni.

Þetta voru með skemmtilegustu páskum sem ég man eftir.  

Heilaga þrenningin var til staðar, góður matur, góð vín

og góðir vinir.

Þið fáið svo uppskrift af brálæðislega góðum eftirrétt næst, ég er að meina það, BRJÁLÆÐISLEGA góður! : )