Gerlaust naan brauð

Ég er að reyna að gera gott naan, svona eins og maður fær á virkilega góðum indverskum stöðum. En þar sem ég á ekki tandoori ofn veit ég nú ekki hvort mér eigi eftir að takast það.

Ég fylgdi uppskrift sem ég fann í eldgamalli indverskri matreiðslubók. Þar er ekki notað neitt ger. Hráefni er blandað saman og látið standa í 6-8 klst.

Naan

• 450 g hveiti
• 2 eggjahvítur
• 1 msk smjör
• 1 1/2 tsk sykur
• 5 dl ab mjólk eða jógúrt
• 1 tsk salt
• Vatn eftir þörf (1/2 dl eða jafnvel minna)

Blandið öllu saman í skál nema vatni og hnoðið (með höndum eða í hrærivél) Bætið við vatni ef þess þarf. (Mér finnst ab mjólkið svo blaut að ég notaði rétt 3-4 msk af vatni)

Hnoðið þar til deigið er mjúkt og fínt. Breiðið yfir skálina (filmu, plastpoka eða rakann klút) og látið standa í 6-8 tíma út á borði.

Skiptið svo deiginu í kúlur, ca á stærð við tennisbolta og fletjið út í ílanga hringi. (Ef deigið klístrast við hendurnar þá má strá örlitlu hveiti á það).

Bakið í vel heitum ofni í 5- 10 mínútur. Fylgist bara vel með brauðunum og takið út þegar þau eru tilbúin. Ég hafði brauðin í 250° heitum ofni í 4- 5 mín.  Ekki hafa þau of lengi í ofninum svo þau verði ekki hörð.

Ég held að leirofninn hefði komið sterkur inn :P 

Ég á eftir smá afgang af deiginu sem er búið að hvíla inn í ísskáp.  Ég ætla að prófa að setja það á pönnuna á eftir. 

Þetta smakkaðist ljómandi vel  með Lamb Vindaloo.  Ég notaði Lamb Vindaloo frá The Cape herb and spice company.

Uppskrift fylgir kryddinum á umbúðunum, Ásamt kryddunum fór í réttinn tómatar úr dós, ab mjólk og laukur, hvítlaukur og ferskt engifer.  Einfalt og smakkaðist mjög ferskt. Þetta er frekar sterkur réttur.

Athugasemdir

[Nanna Gunnarsdóttir (IP-tala skráð) 16.3.2011 kl. 11:07]

Lúkkið á naan-inu er mjög girnilegt hjá þér. Besta naan-uppskrift sem ég hef fengið er í sænskri matreiðslubók sem ég á uppi á háalofti en þar sem letin kemur í veg fyrir að ég sæki hana (þar hefur hún verið síðan í júlí 2004 þegar ég flutti til útlanda í eitt ár og ekki verið tekin niður aftur) hef ég ekki bakað verulega gott naan-brauð í nærri sjö ár! Svona fer letin með fólk. Bókin heitir Indiska kokboken og í henni eru dásamlegar uppskriftir, ekki flóknar þótt manni virðist það kannski við fyrstu sýn en come on, þetta er indverskur matur! Ég man hins vegar að ég grillaði þetta alltaf í ofninum mínum við 275 gráður og fékk jafnvel enn dekkri bletti en þú virðist fá á þitt brauð, næstum svarta og eiginlega dálítið "authentic" indverska. Ef þú þekkir einhvern sem á leið til Svíþjóðar... Eða ef ég skyldi nenna að taka niður kassana með matreiðslubókunum þá skal ég senda þér uppskriftina...

[Soffía Gísladóttir, 16.3.2011 kl. 13:33]

Já! Svörtu blettirnir eru nefnilega must finnst mér. Ég prófaði að elda brauðið á pönnu og þá komu þeir, en best af öllu finnst mér að elda naan og roti á útigrilli. Þá púffast það flott út og það fær á sig þessa fínu bletti.

Prófa næst að setja ofninn á grill, það gæti virkað.

Kannast við letina...